Նոր ուսումնասիրությունը ցույց է տալիս, որ քաշ կորցնելը կարող է պաշտպանել ճարպակալումից առաջացած քաղցկեղից: Հետազոտության արդյունքները հրապարակվել են Diabetes հանդեսում:
Հետազոտողները պնդում են, որ գիրությունը առնչվում է քաղցկեղի առնվազն 13 տեսակի զարգացման ռիսկին: Սա հիմնականում պայմանավորված է հորմոնների, մասնավորապես, էստրոգենի և ինսուլինի ավելցուկային մակարդակով:
Հետազոտությունն իրականացնելու համար գիտնականները վերլուծել են Քլիվլենդի կլինիկայի ճարպակալումից տառապող ավելի քան 100 հազար հիվանդների առողջության էլեկտրոնային գրառումները, որոնցից ավելի քան 5300-ի մոտ քաղցկեղ է առաջացել: Հետազոտողները հետևել են մարմնի զանգվածի ինդեքսի փոփոխություններին՝ մարդու քաղցկեղի ախտորոշումից առաջ երեք, հինգ և տասը տարի ինտերվալով և համեմատել դրանք վերահսկիչ խմբի ցուցանիշների հետ:
Գիտնականները պարզել են, որ քաշ կորցնելը կարող է հինգ տարվա ընթացքում նվազեցնել ճարպակալումից առաջացած քաղցկեղի մեծ մասի զարգացման ռիսկը:
Օրինակ, երիկամների քաղցկեղի ռիսկը նվազել է երեք տարի անց, իսկ էնդոմետրիումի քաղցկեղը՝ երեք և հինգ տարի անց: Բազմակի միելոմայի ռիսկը նվազել է 10 տարվա ընթացքում:
Ավելին, հետազոտողները բացահայտել են, որ քաշ կորցնելը մարդկանց պաշտպանում է նաև ճարպակալման հետ կապ չունեցող քաղցկեղի 16 այլ տարատեսակներից։ Դրանք են մելանոմայի և մաշկի, թոքերի, սեռական օրգանների, աչքերի, ուղեղի և մարսողական օրգանների քաղցկեղները:
Հետևեք NEWS.am Medicine-ին Facebook-ում և Twitter-ում